(സീനിയറായ അദ്ധ്യാപര്‍ ഒരു കാലഘട്ടത്തില്‍ പറയാറുണ്ടായിരുന്ന ഒരു കഥ ഇവിടെ അവതരിപ്പിക്കട്ടെ ! അവരെ സ്മരിച്ചുകൊണ്ട് കഥ തുടങ്ങുന്നു) മാഷ് ഏഴാം ക്ലാസ് ബി യില്‍ എത്തി.
പിള്ളേര്‍ എണിറ്റ് നമസ്തേ പറഞ്ഞു ; ചിലര്‍ എണീക്കാതെയും എന്തോ ചെയ്തു.
എങ്കിലും മാഷ് അതു കാര്യമാക്കിയില്ല.
മാഷ് പുസ്തകം തുറന്നു .
“ കഴിഞ്ഞ ക്ലാസില്‍ എവിടം വരെയാ എടുത്തു നിര്‍ത്ത്യേ“
“ പാഠം പത്ത് കഴിഞ്ഞൂ മാഷേ “ മണ്‍സൂര്‍ വിളിച്ചു പറഞ്ഞു.
“ ഏയ് കഴിഞ്ഞില്ല , അവന്‍ വെറുതെ പറയ്യാ “
“ അത് ട്യൂഷന്‍ ക്ലാസിലാ കഴിഞ്ഞത് “
“ നീയ്യ് കഴിഞ്ഞത് ശ്രദ്ധിക്കാത്തോണ്ടാ”
- ഇങ്ങനെയുള്ള കോലാഹലം ക്ലാസില്‍ നടന്നു.
“ ഒരാള്‍ക്കും ഒരോര്‍മ്മയും ഇല്ല - ഞാന്‍ ഒരാഴ്ച ലീവ് കഴിഞ്ഞ് വന്നപ്പോഴുള്ള അവസ്ഥ നോക്കണേ. പുസ്തകമാണെങ്കിലോ ഇക്കൊല്ലം മാറീതും ‘’ മാഷ് സ്വയം പിറുപിറുത്തു.
അതിനിടെ ഭൂരിപക്ഷം നോക്കാമെന്നായി മാഷ്
അതിനുവേണ്ടി കൈ പൊന്തിക്കാന്‍ പറഞ്ഞു.
“ കഴിഞ്ഞില്ലാ എന്ന് ഉറപ്പുള്ളവര്‍ കൈ പൊന്തിക്ക് “
കൈകള്‍ ഉയര്‍ന്നു ( ചിലര്‍ രണ്ടു കൈയ്യും പൊക്കി )
മാഷ് എണ്ണി - ഭൂരിപക്ഷം കഴിഞ്ഞീട്ടില്ല എന്നാണ് .
പിന്നെ , എന്തോ ഓര്‍ത്തീട്ടെന്നവണ്ണം ടീച്ചര്‍ ക്ലാസിലെ ഏറ്റവും നന്നായി പഠിക്കുന്ന കുട്ടിയായ മധുവിന്റെ അടുത്തു വന്നു . അവനോട് ചോദിച്ചു.
പാഠം കഴിഞ്ഞു വെന്നു അതിനു തെളിവായി ചോദ്യോത്തരങ്ങള്‍ അടങ്ങുന്ന നോട്ട് അവന്‍ മാഷിന് കാണിച്ചു കൊടുത്തു.
പിന്നെ മാഷ് വേറെ ഒന്നിന്നും നിന്നില്ല .
“ എല്ലാവരും പുസ്തകം എടുക്ക് “
“ പാഠം പതിനൊന്ന് എടുക്ക് “
“ പാഠം പതിനൊന്ന് - അരണ “ മാഷ് വായിച്ചു.
ഒരു വരി പുസ്തകത്തില്‍ നോക്കി വായിക്കുകയും പിന്നീട് ആ വരിയെക്കുറിച്ച് തിരിച്ചും മറിച്ചും വിശദീകരണവുമായി ക്ലാസ് മുന്നേറി.
അങ്ങനെ ആ പേജിലെ അവസാനത്തെ വരിയിലെത്തി.
“ അരണ കടിച്ചാല്‍ ഉടനെ മരണം ‘’ മാഷ് ആ വരി ഭീതിയുടെ സ്വരത്തില്‍ അവതരിപ്പിച്ചു.
ക്ലാസ് നിശ്ശബ്ദമായി
മാഷ് വിശദീകരണം നല്‍കി
“ കുട്ടികളെ നിങ്ങളുടെ മുറ്റത്തും പറമ്പിലുമൊക്കെ ‘അരണ’യെ കാണാറില്ലേ . സൂക്ഷിക്കണം . അത് കടിച്ചാല്‍ ഉടനെ മരിക്കും . ഇനി മുതല്‍......അരണയെ കാ‍ണുമ്പോള്‍ സൂക്ഷിക്കുക . അതെങ്ങാനും കടിച്ചാല്‍ ............... “
മാഷിന് മുഴുവനാക്കാന്‍ പറ്റിയില്ല്യ . അപ്പോഴേക്കും ആ പിരീഡ് അവസാനിക്കുന്ന ബെല്‍ അടിച്ചു.
**** **** ***** **** ****
പിറ്റേദിവസം പ്രസ്തുത ക്ലാസില്‍ മാഷെത്തി
പതിവുപോലെ ...........
എവിടെയാ നിറുത്തിയതെന്ന് ചോദിച്ചു.
“ അരണ കടിച്ചാല്‍ ഉടനെ മരിക്കും” കുട്ടികള്‍ പറഞ്ഞു.
മാഷ് ആ പേജ് എടുത്തു.
കഴിഞ്ഞ ക്ലാസില്‍ അവസാനിപ്പിച്ചു നിറുത്തിയ ഭീതിജനകമായ പ്രസ്താവന - “ അരണ കടിച്ചാല്‍ ഉടനെ മരണം“ - വീണ്ടും ആവര്‍ത്തിച്ചു.
പിന്നെ ഒന്നു കൂടി വിശദീകരിച്ചു
പിന്നെ , പേജ് മറച്ചു, മാഷ് ഉറക്കെ വായിച്ചു.
അപ്പോള്‍ ആദ്യവരി തന്നെ മാഷിന്റെ ഉന്മേഷം തകര്‍ത്തു.
“ .....എന്നൊരു തെറ്റിദ്ധാരണ നിലവിലുണ്ട് . എന്നാല്‍ അത് ശരിയല്ല.” എന്നതായിരുന്നു ആ പേജിലെ ആദ്യ വരി
....................
.....................
.....................
വാല്‍ക്കഷണം
ഇത് സംഭവകഥയല്ല . അതുകൊണ്ടുതന്നെ ഇതില്‍ പറഞ്ഞിരിക്കുന്ന കഥാപാത്രങ്ങള്‍ സാംങ്കല്പികമാണ് . അവര്‍ക്ക് ജീവിച്ചിരിക്കുന്നവരോ ,
മരിച്ചുപോയവരോ ആയി സാമ്യം തോന്നിയാല്‍ അത് യാദൃശ്ചികം മാത്രം . അദ്ധ്യാപക പരിശീലന വേളയില്‍,ക്ലാസിലേക്ക് തയ്യാറെടുപ്പിലാതെപോകുന്ന അദ്ധ്യാപകരെക്കുറിച്ച് പറയുമ്പോള്‍ ഈ കഥ ആവര്‍ത്തിക്കാറുണ്ട്.
No comments:
Post a Comment